Liðið!

Borist hefur myndbréf af Staksteinum dagsins og er ljóst af þeim lestri að þeir telja út í hött að brúka handjárn við handtökur,  svo fremi að viðkomandi hafi ekki "nýlega skotið á fjöldasamkomu með hríðskotabyssu"(sic)  Vandlætingin frussast um alla steinahrúguna og er beint í áttina til "liðsins" í bloggheimum sem vilja leyfa "þernunni" að njóta vafans í meintri árás.

Ennfremur stikla steinarnir; 

"Jafnvel þótt í ljós komi að AGSforstjórinn
eigi enga samúð
inni, þá er samt hægt að horfa
með samúð til hans og allra annarra
sem þurfa að sæta bandarísku
refsiréttarfari."

 

 

Puff! gott fyrir "klanið" að vita að þau hefðu átt samúð Staksteina"liðsins" trygga ef dómarinn í New York hefði tekið upp málið þar, ekki satt?

Ef þessi AGS forstjóri á inni samúð vegna þess að ásakanir eru rangar, þá á hann inni samúð annars ekki.

Staksteinar nefna svo til sögunnar Madoff nokkurn sem "viðurkenndi" (nýtt orð í fjárglæpum)  að stunda Ponzi svindl í 25 ár, sem gekk út á það að lokka saklaust fólk til að leggja spariféð sitt inn í "plottið" hans.  Á endanum töpuðu þúsundir manna sparifénu sínu.  Dómurinn hljómaði upp á 150 ár.  Hefði það hljómað betur, að rúmlega sjötugur maðurinn fengi 15 ár kannski?

Það er með ólíkindum er að jafn sigldir og sjóaðir steinar átti sig ekki á hlutverki handjárna í handtökum í Norður Ameríku og samkvæmni í dómum þar. Fjöldamorðingjar eru gjarnan dæmdir í 12-20 lífstíðarfangelsi, af prinsippástæðum, en svo eru dauðarefsingar auðvitað kornið sem fyllir mælinn, og má vel flokkast undir "bandarískt réttarfar" samanborið við umburðarlyndan evrópskan mælikvarða. 

Handjárn og fálkaorður gegna eiginlega ákveðnum hlutverkum, þó ólík séu;  Hlutverk handjárna er að niðurlægja, auðmýkja, sýna boðvald og hvetja til uppgjafar og ........ yfirbuga ef viðkomandi hefur verið að skjóta úr hríðskotabyssu en hlutverk fálkaorðunnar er að upphefja, sýna viðurkenningu, virðingu  og hvetja til dáða.  

 

Með sömu rökum, á ekki að spara þessar fálkaorður líka, eða heimta þær til baka ef orðuhafi hefur tapað virðingunni.

Kannski þarf bara að leggja niður "þernur" til að koma í veg fyrir svona harmleiki.

 

Um eitt geta ríkir og frægir sem "lenda" í kasti við bandaríska  dómskerfið verið vissir;

 Þeir eru líklegir til að vera meðhöndlaðir á sama hátt, eða (aðeins verri) og John Smith frá Mainstreet, sem áreitti óaðlaðandi þernu á hótelherbergi.  Þeir snobba líka upp á við þegar kemur að handtökum.

 

Væri maður samsæriskenningasmiður, væri þessi handtaka gráupplögð og rökrétt skref  í "allsherjarsamsærinu" um ; eina stjórn, einn gjaldmiðil, eitt ríki í heiminum.

Megi sannleikurinn koma sem fyrst í ljós!

 

Athugasemdir

[Jón Gunnar Bjarkan, 18.5.2011 kl. 20:25]

Mér sýnist þú vera kominn nokkuð langt út af sporinu í þessu máli þegar þú ert að tala um "Kannski þarf bara að leggja niður "þernur" til að koma í veg fyrir svona harmleiki. ". Þú lætur nánast eins og fólk sé að taka afstöðu með Kahn og á móti þernunni sem er auðvitað fjarri lagi.

Þú segir að hlutverk handjárnana í þessu tilviki sé að: "Hlutverk handjárna er að niðurlægja, auðmýkja, sýna boðvald og hvetja til uppgjafar og". Mér þykir það mjög undarlegt ef það sé hlutverk að stjórnvalds að niðurlægja, auðmýkja, sýna fólki boðvald og "hvetja til uppgjafar" þegar fólk á að heita saklaust uns sekt er sönnuð. Ef þetta væri hlutverk ríkisins að þá er stutt í að ríkið taki upp pyntingar til að hvetja til uppgjafar. 

Það er heldur enginn að kvarta yfir því að sakborningar séu handjárnaðir, heldur að þeim sé ekki hlíft við að vera beraðir þannig fyrir fjölmiðlun. Í svona umhverfi er ekkert mál að gera út um feril stjórnmálamanna. Repúblikanar eru til dæmis engum líkir í óþverraskap í kosningabaráttu, hvernig færi til dæmis fyrir möguleika forsetakandídats ef hann yrði ranglega sakaðir um nauðgun og fengi þessa meðferð í fjölmiðlun. Rebúblikanar eru mjög líklegir til að fara af stað með þannig ófrægingarherferð, þeir fóru til dæmis af stað með ásakanir á Clinton hjónin að þau væru höfuðpaurar í einum stærsta eiturlyfjahring í USA. Obama hefur mátt mjög lágkúrulegar árásir eins og hann sé ekki fæddur í USA, að hann sé í raun Múslimi að hann sé góðvinur hryðjuverkamanna og þaðan af verra.

Sjálfur er ég ekkert í vafa um að Kahn hafi gerst sekur um það sem á hann er borið ef maður horfir á sögu hans í þessum málum og hafa margar konur borið á hann sömu sakir. En það breytir því ekki að þessi meðferð er mjög á skjön við þá gömlu hefð sem Bandaríkjamenn þykjast státa af sem er að maður skuli vera saklaus þar til sekt er sönnuð. 

[Jenný Stefanía Jensdóttir, 18.5.2011 kl. 21:27]

Jón Gunnar,  ekki þori ég eins og þú að fullyrða neitt um sekt eða sakleysi mannsins, af því að engar sannanir liggja fyrir.   Þessi "meðferð" er orðin gömul hefð sbr. þegar Enron hvítflibbarnir hvoru leiddir út í handjárnum og nær líklega til "kúastráka" skeiðsins.  Þess vegna má draga þá ályktun að handjárn gegni einhverju sýndarhlutverki. Þeir stunda líka pyntingar á óvinum Ríkisins eins og oft hefur verið afhjúpað.  

Erindið fjallaði um hversu klént það væri hjá Staksteinum að nota þetta tækifæri og  votta þeim sem "lenda" í réttarkerfi BNA sérstaka samúð, og hnýta aðeins í liðið sem vildi líka leyfa þernunni að njóta vafans.  

"Fólk" er tiltölulega varfærið í tali sínu, en það voru Staksteinar sem sáu ástæðu til að taka afdráttarlausa afstöðu með DSK, og votta honum samúð, jafnvel þó síðar kæmi í ljós að hann ætti hana ekki skilið.

Sjálf hefði ég talið að samsæriskenningar um New World Order fengi bókstaflega byr undir báða vængi.  Dagsetning yfirtökunnar átti að vera 21.desember 2012, en ég átta mig ekki á því hvort þessi handtaka væri liður í að koma í veg fyrir New World Order, eða brjóta niður andstæðinga plottsins.  Myndi veðja á það síðarnefnda þó. 

http://en.wikipedia.org/wiki/New_World_Order_%28conspiracy_theory%29

 

[Jón Gunnar Bjarkan, 18.5.2011 kl. 22:51]

 Bíddu nú við, afhverju undirstrikar þú sérstaklega að ég fullyrði eitthvað um sekt Kahn eins og það snerti eitthvað það sem ég var að tala um. Mér sem utanaðkomandi persónu er auðvitað fullkomlega frjálst að mynda mér skoðun á hvort hann sé sekur ekki. En þessu má ekki rugla saman við meðferð ríkis við sakborning. Það mætti þó segja að meðferð þeirra á sakborningnum hafi hugsanlega(og kannski ómeðvitað) styrkt mig í þeirri skoðun og það er ég að gagnrýna hér.

Persónulega les ég mjög sjaldan Morgunblaðið nema þá á kaffihúsum eða biðstofum þannig að ég hef ekki lesið þessa staksteina, það sem ég er að benda á er að þessi meðferð hjá ríkinu er slæm, það að þetta sé orðið að hefð vegna Enron er langt frá því að vera einhverskonar afsökun. Ég er þó ekki að segja að Bandaríkin sé eina ríkið sem stundi þetta, þetta viðgengst meðal annars á Íslandi líka.

[Ragnhildur Kolka, 18.5.2011 kl. 23:15]

Já, Staksteinar hafa oftast verið betri. Þessi pempíuháttur klæðir þá ekki.