Glannalegt!

Finnst engum nema mér að framköllun jarðskjálfta með þessum hætti sé háskaleikur!

Hver getur fullyrt að mönnum og húsum stafi ekki hætta af tiltækinu?

Fjöldi skjálfta við Hellisheiðarvirkjun

Stalst í Styrmi!

Stelst stundum að lesa innlendan vettvang fyrrverandi ritstjóra MBL af ýmsum ástæðum. 

Ein stærsta ástæðan er sú að hann snuðaði okkur um skýringar á margtuggðum og líklega frægustu ummælum sem lesa má í skýrslu RNA um "ógeðslega og prinsipplausa þjóðfélagið s.l. 50 ár".  

Greinaflokkurinn innlendur vettvangur er nefninlega alveg fyrirtaks vettvangur fyrir hann  til að skýrgreina nánar hvað og við hvern er átt!   Dæmi eru líka vel þegin, því ef heimildir mínar eru réttar mun "Spillingarsaga Íslands" vera í skrásetningu hjá Þjóðminjasafninu þessi misserin.  

Þangað til kýs ég að skilja ummæli Styrmis mjög vítt, sem aftur á móti gera allar "tóld jú só" sögur hálfógeðslegar líka.  

Fleiri ástæður lúta m.a. af fyrri kynnum af ritstjóranum og lestri leiðara eftir hann, sem stundum fengu hárin til að rísa af fögnuði, þegar hann fjallaði um gjafakvótann og ruglið í kringum hann, en líka af því að umfjöllun blaðsins var oftast í sæmilegu jafnvægi milli ólíkra skoðana, nema rétt fyrir kosningar að sjálfsögðu.   Auk þess veit ég frá fyrstu hendi að ritstjórinn kynnti sér flestar hliðar mála af yfirvegun, og dróg sínar ályktanir út frá þeim.

Lestur innlends vettvangs í dag 18. september 2011, fær mann til að gúggla hvort einhver á jörðinni hafi orðið var við geimskip, sem skilaði  Styrmi aftur til jarðar, eftir 3ja ára útlegð.  

Þjóðarbúið er of dýrt í rekstri  er yfirskriftin, og svo virðist að uppljómunin hafi birst eftir viðtal við "mann af nýrri kynslóð Íslendinga, sem hefur gengið hægt um gleðinnar dyr og uppskorið í samræmi við það."

Gott og vel.  Sjálf hef ég verið ötull talsmaður þess að "ný kynslóð" Íslendinga fái svig- og ráðrúm til að feta sig t.d. á stjórnmálasviðinu.   Því miður er það svo að kynslóð Styrmis; er þrásetnari en Gaddafi og Saddam til samans; og hún má þakka fyrir að "breiðu blóðugu spjótin" eru týnd og tröllum gefin s.l. þúsund ár, því fæstir nútíma Íslendingar vilja berjast á banaspjótum, þó tunga þeirra geti verið bæði hárbeitt en líka þvoglu og þrástagakennd.

Ég tek undir allt tal um óhagkvæmni í ríkis og sveitafélagarekstri, en þegar kemur að "einka" pakkanum þá verður brekkan fljúgandi hál!  

Er ein af þeim sem snupraði stofnanda Bónus á hádegisfundi um árið, af því að mér fannst "rjómafleyting" þeirra á bókamarkaðnum (hálf) ógeðsleg.  Þessi fleyting þurrkaði enda út allar litlu bókaverslanirnar sem settu svip á bæinn. 

Í nafni frjálsrar samkeppni urðu til stórar einingar sem enginn gat keppt við í verði, og því auðgaðist flóra viðskiptanna á þverveginn, eins og t.d. í þjónustu og jafnvel undarlegheitum allskonar.  Nú spyr Styrmir eins og geimvera;  "Hvað ætli valdi því að ritfangaverzlun hefur allt í einu aukizt svona mikið?"  Sjálfri finnst mér þetta spennandi spurning ef rétt er, því slíkt bendir til að grundvöllur sé aftur fyrir hverfisverzlunum og rómantík!  Það má jafnvel skilja skrif Styrmis á þann hátt að hugmyndafræði Marteins Mosdal um  eina ritfangaverslun, eina kjörbúð, eina bílasölu, eina Húsasmiðju osv fr. sé freistandi.    Ég sagði má skilja ...... trúi samt ekki fyrr enn í fulla hnefana að fyrrverandi ritstjórinn sé að meina slíkt.

Allt þetta tal um rekstur þjóðarbúsins, má samt ekki undanskilja grundvöllinn sjálfan; sem er að fólk hafi atvinnu og laun til að kaupa vörur og þjónustu hvort af öðru.  Og að greiða skatta og skyldur til samfélagsins til að standa undir öllum þingmönnunum og aðstoðarfólki þeirra, sem ritstjórinn bendir réttilega á að er svona meira í okkar valdi að skera "fituna" af.

Hér í Kanada eru 98% af fyrirtækjum skilgreind sem "lítil" fyrirtæki sem njóta sérstakrar ummönnunnar (lesist skattaívilnunar)  af yfirvöldum, vegna þess að þau skilja að einyrkjar og fjölskyldur þeirra,  sem sjá fyrir sér sjálf eru "púðrið og dýnamítið" í atvinnulífinu.  Vaxtarkúrfa einyrkja og lítilla fyrirtækja er enda aðalmælikvarðinn á "heilbrigði" kanadíska hagkerfisins!

Ég er búin að fylgjast með þessu þjóðfélagi í 30+ ár.  Ég er sannfærð um að ef við náum að lama  spillinguna og örva  tæra útsjónarsemi og hugvit sem að sönnu býr í landanum, ekki sízt í þessari nýju kynslóð Íslendinga, sem Styrmir fjallaði um, þá getur kynslóðin sem nú stendur á ellilífeyrisbrúninni, um frjálst höfuð strokið, allavega enn um sinn.  

Hún verður samt að láta af "ofsanum og bræðinni" sem hún hefur prjónað um sig þessi 50 ár.  Hvort þeir kjósa að dvelja sitt ævikvöld í raðhúsi í Mosfellsbænum allir saman,hlið við hlið,  hljóta þeir samt að fara að skynja sinn vitjunartíma, því það er einhvern veginn eins með þá og rokkið gamla, ....... það hafa ekki komið almennilegar hljómsveitir eftir 1971 ........ að þeirra mati!

 

 

 

 

 

 

Lagskiptur rekstur OR

Áhugaverð ummæli  stjórnarformanns um rekstur þessarar fyrrum mjólkurbelju Reykjavíkurborgar, sem margir voru sammála og göntuðust með að það tæki tæran snilling, að setja Hitaveituna og Rafmagnsveituna á hausinn!

Hin tæra snilld spratt auðvitað fram, skorin voru júgrin af beljunni og beintengt inn á kirtlana með haugsugu, og "undirliggjandi" rekstrarafkomu næstu 100 ára fretað út um borg og bý og byggð eldhúskompa á heimskvarða oflætis.

Nú þurfa,  nei verða,  notendur veitunnar að draga blóðuga beljuna að landi og greiða 40% hærra orkuverð.  Sú montsaga í útlöndum gildir því ekki lengur að Íslendingar hiti upp öll hús sín með ódýrustu og vænustu orku í heimi.

Hvað er annars þessi undirliggjandi "batnandi" rekstur annað en hærri tekjur vegna þessarar hækkunnar og svo e.t.v. niðurskurður í eldhúsvinnslu rekstrarins?

Mið- og yfirliggjandi rekstur sjoppunnar; vextir - gengismunur og rekstur "blætis fjárfestinga" fyrri ára fer seint batnandi í þessu árferði.  

Ekkert fer eins í fínu taugarnar á undirritaðri eins og að lesa um "bókhaldslegt tap og hagnað" eins og fyrirbærið væri óþægilegur steinn í skónum og væri alls ótengt sjálfum rekstrinum, undir eða yfirliggjandi og allt um kring.

Rekstur OR á uppleið

Persónutöfrar!

Það er sama hvað Björn Bjarnason kverúlantar um meinta guðmæðrun forsætisráðherra yfir þessum "strák", sem mér sjálfri finnst fáranlega til fundið  þá verður ekki hjá því litið að Guðmundur Steingrímsson býr yfir einstökum persónutöfrum, sem gera hann politískt "sexý" (ef ég má sletta götustrákatali)

Hvers vegna;  jú vegna þess að hann talaði út frá hjartanu í Kastljósi.

Hann á ekki langt að sækja þá, enda var faðir hans feikilega vinsæll forsætisráðherra, aðallega vegna persónutöfra. 

Slíkt tal verður aldrei leikið, fótósjoppað eða æft;  það bara er.  

Óska Guðmundi Steingrímssyni góðs í leitinni að svipaðri tegund; og til hamingju með að létta þyngslin af formanni Framsóknarflokksins, sem getur nú siglt seglum þöndum til sinna feðra og fortíðar.

Segir Jóhönnu vera guðmóður nýs flokks

Af hverju þurfa góðir hlutir alltaf að gerast hægt?

Í þessum endurskoðunardrögum er m.a. lagt til grundvallar að framkvæma úrbætur sem FATF hafði lagt til eftir úttekt sína á þessum atriðum árið 2006.

Í ágúst og september 2009 skrifaði ég 5 kafla  "glósur" um peningaþvætti og í tilefni af þessum endurskoðuðu tilmælum sem nú birtast 5 árum eftir að íslenska kerfið var tekið út af FATF,  endurbirti ég 3ja kafla og skil hér eftir link í lokakaflann.

September 2009

Hvernig stóð Ísland sig í aðgerðum gegn peningaþvætti og fjármögnun hryðjuverka?

Frá og með gjaldeyrishöftum sem sett voru á s.l. haust, brustu allar forsendur fyrir alþjóðlegu peningaþvætti á Íslandi, hafi þær verið fyrir hendi.  Óheft gjaldeyrisviðskipti, er grunnforsenda fyrir stórþvotti "skítugra" peninga.  Hins vegar má leiða líkum að því að brotthvarf slíkrar þvottastarfssemi hafi hún verið í miklum mæli  í litlu hagkerfi, hafi ýkt þær alvarlegu afleiðingar sem hrun bankakerfisins hafði s.l. haust.  Um það verður fjallað í öðrum kafla.

Forvitnilegt er hins vegar að skoða aðgerðir og varnir sem voru viðhafðar gegn peningaþvætti í íslensku hagkerfi árin 2006-2008

Ísland er ásamt rúmlega 30 öðrum löndum meðlimur í samtökum FATF (Financial Action Task Force) sem vinna gegn peningaþvætti og fjármögnun hryðjuverka.

Í 10 daga í maí 2006, mætti matsnefnd til Íslands til að mæla hvernig fjármálastofnanir, íslensk stjórnvöld, lög og reglur  uppfylla tillögur og fyrirmæli sem samtökin setja meðlimum.

Nefndin skilaði  u.þ.b 170 bls. skýrsla  og auk þess er læsilegri  18 bls. úttekt úr skýrslunni sem einnig er að finna á heimasíðu samtakanna.

Skýrslan var rædd í október 2006 hjá samtökunum í Vancouver, og gaf Iðnaðar-og Viðskiptaráðuneytið út fréttatilkynningu þess efnis, þar sem þeir töldu að niðurstöður hefðu verið almennt jákvæðar en jafnframt hafi komið fram, eins og venja er, ábendingar um það sem talið var að  betur mætti fara í löggjöf og framkvæmd. 

Því var heitið að áfram yrði haldið að styrkja varnir Íslands og að ráðgjafanefndin sem vann að úttektinni með FATF myndi starfa áfram.

Þetta vakti óskipta athygli mína í þekkingarleit um peningaþvætti á Íslandi, og því fór ég í gegnum úttektina.

Eins og matsaðilum er tamt, gefa þeir "einkunn" við þeim matsatriðum sem framkvæmd eru.  Þessi einkunn skiptist í fullnægandi, að mestu fullnægjandi, ábótavant að hluta, ófullnægandi.  Auk þess má finna greinagóða úttekt á þeim atriðum sem matsnefndin taldi ábótavant og alvarlegt.

Ég snaraði þessu yfir á hefðbundið einkunnarkerfi, og útkoman á matinu var 6,7 eða C

Þessi úttekt var að vísu gerð fyrir gildistöku laga um peningaþvætti, sem vísað er í, í 2.kafla, svo ekki er alveg ljóst hvort nefndin tók tillit til nýju laganna að hluta eða öllu leyti í matinu.

Hér verða talin upp nokkur atriði sem matsnefndin taldi ófullnægjandi og í sumum tilfellum alvarleg:

Viðurlög við brotum um peningaþvætti sýnast vera mjög væg (sekt), einkum í samanburði við svipuð fjárhagsbrot (6 ár).  Dómkvödd viðurlög hafa einnig verið mjög væg, jafnvel í málum sem varða eiturlyfjabrask, þar sem hæstu viðurlög leyfa 12 ár.  Refsiábyrgð lögpersóna (fyrirtækja) þykir mjög þröng.  Viðurlög þykja þannig almennt ekki virka letjandi né áhrifarík í baráttu gegn peningaþvætti.

Tímabundin upptaka eigna   Ströng sönnunarbyrði af hálfu saksóknara hindrar árangursríka tímabundna upptöku eigna.  Skortur á gögnum til staðfestingar á ákvæðinu gefur matsmönnum ekki fullnægjandi sannfæringu fyrir því að þetta ákvæði virki.  Vísbendingar benda til að í öllu kerfinu, sé litið á upptöku eigna sem minniháttar forgangsmál.

Könnun á áreiðanleika viðskiptamanna    Það eru engar almennar kröfur um að kanna endanlegan eigenda "viðskiptavinarins".  Ekki eru gerðar kröfur til banka að ákvarða á skilmerkilegan hátt hvort viðskiptavinurinn er að vinna í umboði annars aðila.  Engar skýrar kröfur um nauðsyn þess að skilja eignarhald og stjórn lögaðila, né að staðfesta hvort manneskjan sem framkvæmir viðskipti hafi til þess lögmætt umboð.

Einstaklingar í áhættuhópi vegna stjórnmálatengsla.  Ísland féll á þessu atriði  þar sem engin slík tengsl eru könnuð.  Í lögunum sem tóku gildi í júní 2006, var gildistöku eins ákvæðis nr. 12 frestað til 1.janúar 2007, ákvæðinu um áhættuhóp vegna stjórnmálatengsla.  (hvers vegna þurfti að fresta þessu ákvæði?)

Viðskipti 3ja aðila  Bönkum er ekki gert að taka nauðsynleg skref til að sannreyna að 3ji aðili sé skráður og uppfylli skilyrði um áreiðanleika.

Óvenjulegar yfirfærslur    Lögin gera ekki skilmerkilegar kröfur um að kanna í þaula bakgrunn og ástæðu yfirfærslna, aðeins minnt á þetta í almennu orðalagi í skýringum.

Skráning grunsamlegra færslna  Skráningarskylda felur ekki í sér skráningu á viðskiptum innherja/markaðsmisnotkun, vopnabrask, þátttöku í skipulögðum glæpasamtökum, þar sem engir slíkir glæpir hafa verið tengdir við peningaþvætti á Íslandi.  (innskot í kafla 2 er fjallað um líklega fyrsta peningaþvættismál sem upp hefur komið á Íslandi um markaðsmisnotkun og innherjaviðskipti)  Nefndin hefur áhyggjur af þessu skráningakerfi í heild og að trygginga og verðbréfafyrirtæki skrá ekki grunsamlegar færslur, né þeir sem stunda gjaldeyrisviðskipti, enda sé ekkert eftirlit haft með því.  

Innra eftirliti  stórlega ábótavant.  Nýju lögin innihalda ekki skilgreindar reglur um innra eftirlit og hvað það þarf að innifela.  Þannig efast nefndin um framkvæmd og eftirlit laganna með áreiðanleika viðskiptamanna.

Ytra eftirlit  almennt ábótavant, vegna skorts á þekkingu og endurmenntun, skorts á mannafla, og fjármagni.  Þrátt fyrir að samþykktir og reglur séu til staðar, eru engin viðurlög gagnvart framkvæmdastjórum og þeim sem ábyrgð bera á framfylgd laganna.

Tölfræðileg gagnasöfnun  fékk falleinkunn í þessari úttekt, enda hefur skráning í samræmi við tillögur samtakanna ekki verið framkvæmd, eða hafist á þessum tíma (2006)

Þessi listi er miklu ítarlegri, og fátt kemur raunar á óvart, einkum er varðar ytra eftirlit, enda hefur Fjármálaeftirlitið þrástagast á þeirri ástæðu að mannekla og skortur á fjármagni hafi verið meginorsök fyrir  takmörkuðu eftirlit  með íslenskum fjármálamarkaði yfir höfuð, hvað þá fjarrænum glæpum eins og peningaþvætti 

Þetta var 2006, síðan liðu 2 ár þar til bankakerfi Íslands hrundi gjörsamlega sumum að óvörum.

Forvitnilegt væri að vita hvernig og hvort þessum ábótaatriðum frá 2006 hafi verið sinnt og unnið að úrbótum, á þeim tíma sem gjaldeyrisfærslur og peningamagn frá og til Íslands náði stjarnfræðilegu hámarki.

Ef ég væri Godfather, væri eitt af daglegum verkefnum að kanna hvaða lönd í heiminum hefðu heppilega veikan infrastrúktur til að berjast gegn þvotti á mínum skítugu peningum.  Fljótlega hefði ég  rekist á þessa skýrslu FATF og kallað saman skyndifund með mafíunni og sagt þeim að ég hefði fundið "gósen" þvottastöð norður í hafi.

Ef ég væri mafíósi og hugsaði svona, hvers vegna skyldu aðrir ekki hafa gert það.

.... og ef þeir hafa hugsað því myndu þeir ekki hafa framkvæmt það?

 

 

 

 

 

Endurskoða tilmæli gegn peningaþvætti

Epli er ekki sama og Apple

.... gömul saga og ný,  eða voru ekki Kaupþing, Glitnir og Landsbankinn einir  og óstuddir ríkari en Ísland allt sinnum tíu. Að ótöldu öllu fyrirtækjaspagettíinu sem vafðist í kringum.   Skulduðu þessi kolföllnu fyrirtæki ekki a.m.k.  tíu sinnum meira en allar tekjur Íslands til langs tíma?

Skuldirnar verða aldrei borgaðar, nananana bú bú, þið þarna vitlausu erlendu fjárfestar sem trúðuð trúðunum.   Það virðist jafnvel vera komin sterk "landhelgissamstaða" innan landhelgi að stimpla ykkur sem fávita, bjána og svindlara, að hafa þrýst þessu fé svona grimmt að gaurunum, að núna eru þeir orðnir "grey duglegu strákarnir, sem vildu svo vel".

Greyin halda enn fyrri styrk og eru nú að brýna sverð og skildi, til frekari afreka á sviði pappírs og sýndarviðskipta.

Annars átti þessi færsla að fjalla um Apple!

Er enn ósnortin af aðdáun yfir hverju nýju "gadget" sem inn á þetta heimili ratar og er merkt þessu  "one bite apple".

Í friði, frelsi og fögnuði

 

Apple ríkara en Bandaríkin

Óbein sönnun fullnægjandi gagnvart "engum kórdrengjum"

Þessi kynslóð réttarkerfis á Íslandi mun að líkindum skilja eftir fullar skjalageymslur  af ókláruðum og "köldum" málum frá tímabilinu 1974 - 2008 og síðar jafnvel, vegna skorts á hugrekki við að horfast í augu við réttvísina.  

Á Íslandi er eins og  réttvísin sé ekki blind eins og styttan fræga á að endurspegla, neibb það sést í gegnum klútinn sem setur  biskupa, kórdrengi og götustráka í mismunandi dilka.

Hér er úrdráttur úr greinargerð Eiríks Tómassonar um sönnunarbyrði og sönnunarmat, sem formaður Lögmannafélagsins vísar í og telur að engar nýjar upplýsingar geti breytt sönnunarmati dómara Hæstarréttar.

"[Með] því er vísað til þess hvaða styrkleika þau sönnunargögn, sem fram eru
komin og leiða líkur að sök ákærða, verði að hafa svo að sakfellt verði, að teknu tilliti
til þeirra sönnunargagna sem mæla gegn þeirri niðurstöðu. Samkvæmt 46. gr. opl.verða sönnunargögn málsins að horfa þannig við dómara að ekki verði vefengt meðskynsamlegum rökum að ákærði hafi framið þann verknað sem hann er sakaður um.

Þótt sönnunarmatið sé frjálst í þeim skilningi að
dómari sé ekki bundinn af neinum tilteknum sönnunargögnum eða sönnunaraðferðum eru honum engu að síður skorður settar. Þannig verður mat hans á sönnun að vera hlutlægt og jafnframt verður það að styðjast við málefnaleg rök. Sérstaklega verður
hann að forðast að láta persónulegar skoðanir sínar eða önnur ómálefnaleg sjónarmið
ráða niðurstöðu sinni."

Á mannamáli;

Sönnunarmat þarf að styðjast við málefnaleg rök, hlutlægni, og heilbrigða skynsemi.

Formaður lögmannafélagsins virðist eiga mjög fá skoðanasystkini um  réttlætingu á endurupptöku GogG málsins.

Þrátt fyrir það, mun tregðulögmál réttvísinnar koma í veg fyrir lágmarks sanngirni og því mun það líklega koma í hlut komandi forsætisráðherra árið 2035, sem stundar nám í leikskóla nú, að biðja afkomendur og aðstandendur sakborninga í GogG málinu afsökunnar, svona eins og Jóhanna gerði kinnroðalaust við "Breiðavíkuræskuna" vegna þess að ábyrgðin á verknaðinum var mátulega langt frá í tíma og rúmi.

Ekkert nýtt sem kallar á endurupptöku

Nei verður Já og Já verður Nei.

Þessa dagana fer fram að mörgu leyti mjög athyglisverð kosning í Bresku Kólumbíu. 

1. Atkvæðagreiðslan snýst um að samþykkja eða hafna sameinuðum "virðisaukaskatti", sem fráfarandi fylkisstjóri setti á og varð honum að falli.

2.  Atkvæðagreiðslan fer fram í póstkosningu

3. Þeir sem voru á móti sameiningu skattsins og voru í "nei" liðinu, þurfa nú að svara "já" vegna furðulegs orðalags á atkvæðaseðli.

Forsaga:

GST eða hinn eiginlegi virðisaukaskattur hér í Kanada er 5%, síðan er fylkistengdur söluskattur, PST lagður á vörur og þjónustu, með sérstökum undantekningum þó.  PST hér í BC var 7% en t.d. í olíufurstafylkinu Alberta er hann 0.  Þá var þessi skattur 8% í Ontario.  Þegar skatturinn var sameinaður voru flestar undantekningingar felldar niður, og sameinaður HST yrði 5+7= 12%.

Þessi skatta"hækkun" er talin helsta ástæða fyrir falli  fylkisstjórans Gordon Campbell, sem hafði þó sem fylkisstjóri, hrist af sér þá skömm að vera tekinn fullur undir stýri á Hawaii, og lögreglumynd af kappanum birst í öllum dagblöðum í upphafi árs 2003.  

Undanþága frá PST vegna vinnulaunahluta þjónustu skyldi felld niður, með þeim afleiðingum fyrir almenning að hárklipping, málning, húsbyggingar og fleira hækkaði í verði sem nam 7% á vinnuhlutann.  Á móti kemur að virðisaukaskattsskyldir aðilar mega nýta PST hlutann sem fullan innskatt, af vöru og þjónustu til eigin nota, sem skv. Gordon Campbell átti að skila sér í lægra vöruverði.

Þó að hagfræðileg rök séu fyrir því að vöruverð lækki í verði, þá er mikil tregða á því.  Ástæður eru margvíslegar, m.a. að  viðskiptalífið hefur þurft að gleypa aðrar hækkanir eitt og óstutt án þess að geta þrýst þeim að fullum þunga út í verðlagið. 

Þess í stað hefði fylkisstjórinn átt að lækka PST hlutann um 1-2% þannig að heildarskatturinn hefði orðið 10-11% og hann sæti trúlega enn við völd, og ég ekki að fjalla um þessa atkvæðagreiðslu.  Kosningabaráttan stjórnar snýst um að HST fái að halda sér en lofað er lækkun á skattinum niður í 10% fljótlega.  

 

Póstkosning

Almenningur knúði fram þessa (þjóðar)atkvæðagreiðslu og nú hafa atkvæðaseðlar verið sendir til kjósenda.

Í kosningaumslaginu eru 3 umslög  A-B-C og kjörseðill. Þegar búið er að krossa við Já eða Nei er kjörseðillinn settur í A umslag sem er merkt "Secrecy Envelope".  Það er síðan innsiglað og sett í annað umslag, með nafni og heimilisfangi kjósandans.  Kjósandi skal staðfesta með undirskrift og símanúmeri, en kjörstjórn áskilur sé rétt til að hringja og kanna hvort viðkomandi hafi kosið.  Loks er þetta umslag sett í frímerkt umslag merkt kjörstjórn.

Þessi aðferð svipar mjög til utankjörstaðaatkvæðagreiðslu, sem ég hef ítrekað tekið þátt í hér vestan hafs vegna þjóðaratkvæðagreiðslu um Icesave og fleira á Íslandi.  

Áhugavert væri að kostnaðargreina þessa aðferð og bera saman við kostnað vegna hefðbundinna kosninga og velja það sem hagkvæmara er, þó svo að rafræn kosning sé á næsta leyti.

Orðalag kjörseðils - leiðandi spurning

Þeir sem voru á móti og sögðu NEI sín á milli um  sameiningu PST og GST, verða nú að vera á varðbergi, því á kjörseðlinum stendur í lauslegri þýðingu:

"Ertu fylgjandi því að hætta við HST og endurvekja PST?"  Já eða Nei

Þeir sem svara Já eru því á móti HST

Þetta orðalag hefur vakið furðu og rugling, og nokkrir fjölmiðlar hafa sýnt fram á að mjög margir misskilja þessa spurningu.

Væri sambærilegt ef atkvæðaseðillinn um aðild Íslands að ESB hljómaði svona:

        Ertu fylgjandi því að fella ESB samninginn?  

           Meira að segja lógóin myndu svínvirka áfram.

"Kirkjan" vanbúin?

Á ögurstundum, þegar þjarmað er að fólki vegna stórkostlegs gáleysis, sinnuleysis, hroka og vanhæfni; er svarið stundum:  "ég meinti ekkert með þessu, ætlaði aldrei að valda neinum skaða"

Svona tala forhertir fjárglæframenn líka.

Dettur einhverjum í hug að æðsta markmið þessa "fína" fólks,  sé að valda sálarstríði, hugarangri og sorg óbreyttra borgara?

Nei, vökustaurinn snýst um að sjá fyrir afleiðingar kjarkleysis og aumingjaskapar í þessu tilfelli kirkjunnar manna. 

Það var ágætt hjá Baldri Kristjánssyni að axla ábyrgð án þess endilega að kenna "huglægri" kirkju um.   Hann vísaði í velþekktar skýringar um augljóst vanhæfi hans sjálfs vegna nálægðar við "sakborning" og lögfræðinga hans.     Hefði verið enn betra, að hann hefði séð þetta í þessu ljósi 1996.

Það var líka ágætt að hann féll ekki í "við borðuðum gull" eftirá skýringar, sem annar anti-bakkus prestur vísar í í DV, sem alveg nýr vinkill á útskýringu hrunsins og enginn hefur áður fjallað um!

Biskup Íslands, sem er ábyggilega vænsti maður, að undanskilinni aðkomu hans frá A-Ö í "biskupsmálinu" myndi trúlega öðlast fyrirgefningu út fyrir kirkjumúrana, ef hann axlaði ábyrgð og viki úr embætti.

Að tala um vanbúna kirkju er "leim", því "kirkjan" í þessu tilfelli var hann sjálfur m.a. og fyldarhlekkir sem reyndust þegar allt kom til alls "veikustu hlekkir" kirkjunnar.

Skoðaði Skálholtskirkju í dag og fann þetta skilti;

Það er kalt á botninum; þá má alltaf læðast út og ylja upp.

 

„Við vorum vanbúin“

Sirwife vika Ísland

Alveg síðan hrunið varð, hef ég verið sannfærð um að þeir sem misstu (sjálfs)virðingu fyrir mannorðinu sínu, myndu að minnsta kosti "harma"  tímabundið hömluleysi í "ég á´etta ég má ´etta, ég á ´etta skilið, stöngin inn, keep it simple stupid" þjóðfélagi sem þreifst undir (ó)styrkri stjórn gauranna, sem héldu að þeir hefðu fundið upp óendanlega norð-austurlægt efnahagskerfi, sem myndi aldrei fara suður.

Hugsa; eftir á að hyggja, að eina sem hefur stigið í verðgildi síðan þá er mannorðið.

Mér dettur ekki í hug að væna þessa "gaura" um að vera "simple or stupid", eða hver hefur ekki horft á "Survivor" og uppgötvað að sá sem lítur á leikinn sem leik og svíkur og prettir aðra spilara, sem í "heimsku" sinni treystu viðkomandi, vinnur milljón dollara í lokin!

Þannig var þetta klikkaða bankaæxli fóðrað; sem einhvers konar "NoSir YesSir game" og þessi leikur er enn í fullum gangi.  

Ég hef eiginlega ekkert þanþol gagnvart fjársvikum hverskonar og á því frekar erfitt með að flokka þau í  vvv flokkinn  (vond, verri, verst)

Einhvern tíma var í gangi pæling hvort hægt væri að framkalla jarðskjálfta, ef allir jarðarbúar myndu hoppa á sömu sekúndu.  Jörðin er bara massívari en svo að það sé einhver hætta á að við  getum framkallað slíkt. 

Hins vegar á hugsunin " hvað myndi gerast, ef allir gerðu eins og ég" (Immanuael Kant) ekki bara rétt á sér, heldur hefur hún  fært sönnur á að ef nógu margir inní ákveðnum massa gera eins, verða afleiðingar annað hvort góðar eða slæmar, ekki bara fyrir þá sem gerðu,  heldur miklu fleiri, sem voru að pæla í allt öðru. 

Rosa-uppgangur íslensks efnahagslífs sem endaði í Rosa-hruni er óprýðileg dæmisaga inn í framtíðina þegar óháðar kynslóðir ná að flétta rökum og staðreyndum saman í rétta mynd.

Á meðan verða "survivors Iceland" að þreyja þorran, lesa Rosa-bækur og Rosa-skýrslur um ömurlega viðskiptahætti, mistök í starfi, og stórkostleg gáleysi og núna nýlega eru farnar að berast Rosa-útskýringar og afsakanir vegna dómsmála sem hafa fallið eða eru í ferli;

"Ekki mér að kenna, allt endurskoðendanum að kenna"  dæmist "the most pathetic statement of the week" sir! eftir Rosa baráttu við  "knúsa ekki svona konur no sir!" statementið.

BB biður Rosa-Baug "innilegrar afsökunar" (sic) á mistökum  um rangfærslur í bók, kannski til að koma í veg fyrir málssókn þrátt fyrir að þessi "fluga" úr kassa Sjallana hafi reynst fyrrum félögum dýrkeypt í málarekstri út fyrir landsteina meira að segja.  

Tel  reyndar sterkar líkur á  að þessi tiltekna "Baugsfluga" sem fangaði hug, þor  og allan fókus margra háttsettra manna í áraraðir, hafi kolruglað jafnvæginu í þjóðfélaginu  og skapað öfug áhrif, sem veiðimenn sáu ekki og sjá ekki enn fyrir.    Þessi fluga var nefninlega bara hönnuð fyrir einn lax, hinir laxarnir fengu að taka heljarstökk yfir höf og álfur áður en veiðidegi lauk.

 

Fjarlægðin gerir fjöllin blá og mennina mikla; 

Nálægðin gerir fjöllin fögur og mennina litla!