Aulahrollur upp á 8 stig á Richter

framkallaðist við lestur þessa bréfs frá "landa" mínum Lesperance um auðmenn sem eru ekki "jackasses".

Það eru nokkur atriði í bréfinu sem framkalla áður óþekkta andlitskippi;

Growth Creators, kallar hann þessa 10 einstaklinga, sem við skulum sem snöggvast þýða "broddborgarar".

Ferilskrá óskast

Broddborgarnir eru bugaðir af áhyggjum yfir ástandi í heimalandinu vegna umhverfisvandamála, tjáningafrelsi og sjálfbærni og jafnframt gætu litlu broddgöltarnir þeirra verið kvaddir í herinn fyrirvaralaust.  (lygi)

Af lýsingum á þessum broddborgurum má ætla að þeir hafi látið þungt að sér kveða í sínum heimalöndum, á vettvangi stjórnmála, verndunarstofnana eða góðgerðastofnana hvers konar, áður en að þessari ögurstundu er komið að sækja um annan ríkisborgararétt.   Þeir ættu því að hafa rekjanlega slóð sem hægt er að fletta upp praktíkinni á prédikun þeirra.   Lögfræðingurinn varar við því að gúggla þetta fólk, því það gæfi alls ekki rétta mynd.

Það er sérstaklega þessi setning sem veldur velgju;

"They already have determined that strategic philanthropy is an important part of their
lives and are looking for ways of creating a worthwhile legacy that will endure
beyond them. " 

Það hefði verið trúverðugt að sjá ferilskrá þessara 10 sem sýnir þessa góðgerða- og mannúðarkennd sem er svona mikilvægur hluti af þeirra lífi.  Hjónaleysin Angelina og Brad Pitt eru t.d. fólk sem "practice what they preach" og greinilega fylgir sannfærandi hugur máli í öllu þeirra  starfi á vegum mannúðar og uppbyggingar, hvaða svo sem hvatir kunni að liggja að baki nema ef vera skyldi góðar hvatir.

Sakaskrá óskast   Ískyggilega ísmeygilegt er svarið við spurningunni um sakaferil.  Það þjóni engum tilgangi, enda hafa þessir aðilar aldrei búið á (lesist framið brot) Íslandi og því skipti það ekki máli.  Lögfræðingurinn ætti að vita að hans eigið heimaland, vill fá sakavottorð skrifað á ensku, stimplað af löggiltum dómtúlk og dagsett í dag áður en þeir taka umsókn um búsetu (ekki einu sinni ríkisborgararétt) til skoðunnar.

Dómsaga óskast   Lögfræðingurinn gefur fyllilega til kynna að þessir aðilar séu skotmörk óprúttinna aðila sem lögsækja "broddborgara" til þess eins að valda þeim óþægindum, sem broddborgarar eru jafnvel tilbúnir að semja um greiðslu til að losna undan.  Þessar lögsóknir eiga ekkert skylt við lögbrot, heldur einungis óþægindi af hálfu afæta og öfundsjúkra.   Þurfum ekki að sækja langt yfir spor-Bauginn til að finna sambærilega útskýringu á hvers vegna viðkomandi er með æviráðna varnarlögfræðingaskrifstofur í mörgum löndum.

Skattgreiðsluferill óskast

Öll umræða um ógleði hópsins gagnvart stjórnvöldum í heimalandi og meintri sóun á "þeirra" skattdollurum vekur auðvitað þvílíka ógleði að ekki er hægt að fjalla um án þess að hrifsa ælupokann af  Tryggva Herberts.  Sérstaklega þegar verið er að reyna að múntra íslensk stjórnvöld fyrir skynsemi, ráðdeild og réttlæti í atgervi öllu, með þokkalegri virðingu þó fyrir viðleitni þeirra í vonlausu árferði.  Þetta er einmitt þjóðflokkurinn sem treystir sjálfum sér bezt til að útdeila "molunum" til múgsins, svo mikið beri á og lýðurinn sturlist af  persónulegri velþóknun til þeirra.

 

Ég skora á fólk að lesa þessa sjö blaðsíðna greinagerð sem fylgir fréttinni.  Þó Íslandi veiti ekkert af hjálparhönd við atvinnuuppbyggingu hvers konar, og umfjöllun um 100% sjálfbærni í orkuöflun, fyrst landa í heiminum hljómi óstjórnlega spennandi,  þá er ekki sama hver, hvernig og hvenær og hversu mikið það er gert.

Hér blikka 10 rauð ljós og 10 rauð flögg, sem þessir 10 einstaklingar verða að gera grein fyrir ef ómengaður hugur fylgir máli.  Þess fyrir utan þá á alls ekki að selja ríkisborgararétt án kröfu um undanfara i búsetu og þátttöku í þjóðfélaginu, líkt og önnur lönd þ.m.t Kanada eru grjóthörð á.

Ég er fegin að heyra að innanríkisráðuneytið og ráðherra þess, svo og öll ríkisstjórnin er ekki ginkeypt fyrir þessari froðu.  

 

 

Spurningar og svör um auðmenn

Hugmyndafæð, depurð og tepruskapur í fjáröflun Ríkis og sveitafélaga!

Svo lengi sem ég man, hafa kröfur um nýjar hugmyndir í fjáröflun verið  háværar en jafnskjótt og  nýrri og frjórri hugmynd er varpað fram, rísa upp háar mótmælaöldur, sem ná að því er virðist að kæfa alla nýsköpun í fjáröflum Ríkis og sveitarfélaga í fæðingu.    Þessi mótmæli má jafnvel líkja við tepruskap eða tóma vitleysu, a.m.k. eftir á að hyggja. 

Á ferðalagi mínu um Thailand á dögunum, vakti það óskipta athygli mína að heyra að aðeins 2 milljónir manna greiddu skatta, af 64 milljóna mannfjölda.  „Hvernig fjármagnar Ríkið þá verkefnin og  hmhm herkostnaðinn við konungsríkið“? spurði ég.  „Ríkið rekur lottó, og allir spila í lottói, það er svona partur af karmatrúnni að  ríkidæmi og góðir hlutir gerist hjá „góðu“ fólki “.  Skattsvik og spilling er sjálfsagður hluti af tilveru fólksins.

Þó ég sé sjálf haldin innbyggðu ofnæmi  fyrir happdrætti  og lottói, (leiddist að eyða vonarvinningum í huganum) þá er ég alls ekki á móti fyrirbærinu, enda upplifa margir spennu og stundargleði í kringum lottó og þeir fiska sem róa.  Ég hef hins vegar stundum gaman að spila póker fyrir hundraðkalla, þó með því skilyrði að viðspilendur séu alvöru fólk, með bakgrunn, sögu og slatta af húmor. 

Þess vegna skil ég ekki af hverju hugmynd um Ríkisrekið fjárhættuspil sé ekki komin á framkvæmdastig.  Þannig gætu Ríki og/eða sveitarfélög  slegið nokkrar flugur í einu höggi;

•          Ólögleg starfsemi, upp á yfirborðið – skattskyld  með leyfisgjöldum og ágóðahlut
•          Nýbreytni  í skemmtanaiðnaði og veitingarekstri
•         Styrkir ferðamannaiðnað
•         Nýr skattstofn
•          Atvinnuskapandi  - margföldunaráhrif
•          Auðgar mannflóruna
•          Spilafíkn – eiturlyfjafíkn og  áfengisfíkn eru til staðar þrátt fyrir boð og bönn
  

 

 

Hægan, hægan

áður en ofsinn blindar sýn yfir þessum frökku skoðunum, ófyrirleitni og skorti á meðaumkun með þolendum spilafíknar, þá .........  spratt þessi pistill upp í hugann við að lesa grein í Vancouver Sun  (sjá link) í morgun um áætlanir fylkisins að nýju Casinói í hjarta borgarinnar í endurbyggðri  íþrótta/samkomu/hljómleikahöll (einskonar Hörpu) þar sem opnunar og lokaathöfn vetrarólympíuleikanna voru haldnar fyrir ári síðan, og ósjálfrátt bar ég þessar áætlanir saman við væntanlegan „skrefatunnuskatt“ Jóns frænda.

Auðvitað eru til spilafíklar hér í þessari borg eins og annars staðar, en langsamlega langflestir „ know their limit and play within it“.  Auk þess rekur fylkið öflug varnarverkefni til aðstoðar spilafíklum.  Stjórnvöld settust einfaldlega niður og  horfuðst í augu við að án þátttöku í þessari „grein“ færu (skatt)tekjur fljúgandi til annarra fylkja eða landa í gegnum netheima.

Það er gaman að geta þess að fylkislottóið BCLC notar íslenskan hugbúnað frá Betware.

Fjárhættuspil tengist oft undirheimastarfsemi, peningaþvætti og glæpastarfsemi. 

Langflestum stjórnvöldum finnst eðlilegra að draga starfsemina upp á yfirborðið og berjast gegn glæpum þar, frekar en í dimmum undirheimum.

Punkturinn er þessi;  það þarf meiri fjölbreytni í peningaöflun hjá Ríkinu, og hún þarf ekki alltaf að felast í grautfúlri skattheimtu sem gefur ekkert sýnilegt í aðra hönd, nema vonbrigði og vonsku eða niðurskurði á grundvallarréttindum framtíðar skattgreiðenda og íbúa þjóðfélagsins. 

 

Fækka í yfirstjórn borgarinnar

Forgive me!

sagði Charles Ferguson í kvöld, þegar hann tók við Oscarnum fyrir fræðslumyndir (Documentary)  INSIDE JOB,

"Afsakið mig, ég verð að byrja á þessu;  næstum þremur árum eftir hræðilegt efnahagshrun af völdum fjárglæpamanna, situr enginn yfirstjórnandi í fangelsi.  Það er slæmt."

Hér er teaserinn úr Inside Job, og að sjálfsögðu er Ísland í stóru hlutverki.

INSIDE JOB

Í þessu kynningarmyndbandi nr. 3 kemur Frederic Mishkins við sögu, sá sem gaf út falskt heilbrigðisvottorð á íslenskt efnahagslíf greitt af Verslunarráði, eins og frægt varð.

 

http://www.economicdisasterarea.com/index.php/features/frederic-mishkins-role-in-icelands-collapse/

Efnahagsbrot í heilbrigðis og sjúkratryggingakerfi!

Margir telja að ein svívirðilegustu efnahagsbrotin felist í brotum gegn sjúkum, þjáðum og þeim sem minna mega sín.   Þó réttlæting slíkra brota hjá brotamönnum, undanskilji kannski nokkur  tengsl við sjúka og þjáða, en beini frekar réttlætingu sinni að "ríkinu" líkt og skattsvikarar gera gjarnan,  þá eru þessi brot býsna kræf og ófyrirleitin, hvernig sem á það er litið.

Síðan í Maí 2009 hafa efnahagsbrot í heilsukerfi BNA verið á dagskrá.  Þá voru stofnaðar „ árásasveitir“ gegn þessum brotum með sameiginlegri aðkomu Heilbrigðis- og Dómsmálaráðuneytis BNA.

Lagarammi

Það eru einkum 5 lög í BNA sem fjalla sérstaklega um þessa tegund af efnahagsbrotum;

Lög gegn fölskum kröfum  (False Claim Act), sem fjalla um ólögmæti þess að senda kröfu til sjúkratrygginga, sem kröfuhafi veit eða má vita að sé fölsk eða sviksamleg.  Brot við þessum lögum varða háum sektum og jafnvel fangelsi en mikilvægasta refsingin er „útskúfun“ viðkomandi  brotaþega út úr heilsukerfinu.

Lög  gegn mútum og bakgreiðslum ( Anti-Kickback Statue), þrátt fyrir að það tíðkist og sé ásættanlegt í sumum atvinnugreinum að verðlauna þá sem mæla með viðskiptum við ákveðna aðila eða fyrirtæki, þá er slíkt skilgreint sem glæpur í  heilbrigðiskerfi BNA.  Brot við þessum lögum varða háum sektum, fangelsi og útskúfun.

Lög um „nápot“ heilbrigðisstarfsmanna  ( Physician Self-Referral Law/Stark Law)  banna heilbrigðisstarfsmönnum að vísa sjúklingum í þjónustu, vörur eða heilsugæslustöð, sem þeir  sjálfir eða náin fjölskyldumeðlimur  á fjárhagslegra hagsmuna að gæta.  Þannig má læknir ekki vísa sjúklingi í hjólastólaverslun sem konan hans rekur.  Brot við þessum lögum varða sektum og útskúfun.

Lög um útskúfun  (Exclusion Statute)    Sú lagaskylda hvílir á yfirvöldum að útskúfa alla sem gerst hafa sekir um glæpi gagnvart heilbrigðiskerfinu, frá þátttöku í heilbrigðistryggingakerfinu.  Þannig getur útskúfað heilbrigðisstarfsfólk ekki sent reikninga til sjúkratrygginga vegna sjúklinga sem þeir hafa stundað,né stofnun eða læknastofa sem þeir starfa á.

Loks geta yfirvöld sótt skaðabætur og sektir fyrir margs konar efnahagsbroti  í gegnum  „einkamálalöggjöf“  (Civil Monetary Penalites Law) þar sem sektir fyrir hvert brot geta verið frá $ 10.000 - $50.000

Dæmi um tegundir efnahagsbrota í heilbrigðiskerfi

·         Rukkun  fyrir þjónustu sem aldrei var veitt / eða þjónustan  ranglega kóðuð.  (upcoding)

·         Rukkun fyrir þjónustu sem var ónauðsynleg, framkvæmd af fólki án réttinda eða þjónustan var svo léleg að hún var einskis virði

·         Seljandi hjálpartækja rukkar  fyrir tæki sem aldrei var afhent

·         Einhver notar sjúkratryggingu annars aðila til að njóta þjónustu, lyfja eða tækja

·         Rukkað fyrir hjálpartæki sem hefur verið skilað

·         Bakgreiðslur og gjafir frá lyfjafyrirtækjum eða tækjaframleiðendum gegn því að vísað sé til viðkomandi.

·         Frí lyfjasýnishorn seld

·         Fjárhagslegir hagsmunir heilbrigðisstarfsmann ráða tilvísun, úrræði eða þjónustu.

 

Heilbrigðisstarfsmönnum  er ráðlagt að fara í gegnum „dagblaðaprófið“ þegar þeir eru að vega og meta hagsmunaárekstra eða hvort aðgerðir þeirra gætu hugsanlega varðað við lög.  Þetta próf snýst um hvort viðkomandi vilji að  atburður eða aðgerð birtist á forsíðu blaðanna.

 300 manna efnahagsbrota árásasveit ræðst til atlögu:

Árásasveitin  réðst til atlögu þann 17. Febrúar s.l. með ákærum gegn  111 heilbrigðisstarfsmenn víðsvegar um Bandaríkin vegna útgáfu falskra reikninga að fjárhæð sem nemur meira en $ 225 milljónir

Í Miami voru 32 ákærðir, þ.m.t. 2 læknar, 8 hjúkrunafræðingar fyrir þátttöku í efnahagsbrotum að fjárhæð $ 55 milljónir í falskri reikningagerð fyrir heimahjúkrun, hjálpartæki og  lyf

Í Detroit voru 21 ákærðir, þ.m.t. 3 læknar, 3 sjúkraþjálfarar  fyrir efnahagsbrot að fjárhæð $23 milljónir í fölskum heilsugæslureikningum, óframkvæmdar rannsóknir og sjúkraþjálfun sem aldrei var framkvæmd.

Í Brooklyn New York voru 10 einstaklingar ákærðir, þ.m.t. 3 læknar og 1 sjúkraþjálfari fyrir svik að fjárhæð $ 90 milljónir í fölskum reikningum fyrir sjúkraþjálfun og taugarannsóknir.

Í Tampa voru 10 ákærðir fyrir þátttöku í svikum að fjárhæð $ 5 milljónir í tengslum við falska reikninga í sjúkraþjálfun , hjálpartækja og lyfja

S.l. 4 ár hafa aðgerðir gegn efnahagsbrotum í heilbrigðiskerfi BNA saksótt 990 einstaklinga fyrir brot að fjárhæð $ 2.3 milljarða

Sjúklegar  fjárhæðir

Eins og ávallt þegar kemur að því að meta hugsanlega fjárhæð tiltekinna efnahagsbrota ríkir mikil óvissa í áætlun.  Þó er líklegra að áætlanir séu ávallt í varfærnara lagi, raunveruleikinn sé alltaf skuggalegri en talið var.  Af  528 milljarða dollara útgjöldum til heilbrigðismála telja yfirvöld að 48 milljarðar séu svik, eða gróflega 9% sóun.    Ef útgjöld til heilbrigðismála á Íslandi eru 100 milljarðar, þá gætu áætluð svik numið 9 milljörðum króna, eða treystir einhver sér til að segja að svona efnahagsbrot fyrirfinnast ekki á Íslandi?

Vilja sameina efnahagsbrotadeild og sérstakan saksóknara

Fyrirsjáanlegt, þrátt fyrir mikla lögfimi.

Framsal Assange frá Bretlandi til Svíþjóðar byggir á framsalslögum í flokki 1 milli Evrópuríkja.  Ekki er hægt að bera fyrir sig harðræði né dauðarefsingu, þar sem öll lönd innan Evrópu lúta sömu/svipuðum lögum um réttindi sakborninga.

Lögfræðingur Assange hefur á hinn bóginn farið út í mikla lögfimi til að koma í veg fyrir að skjólstæðingur sinn verði sendur til Svíþjóðar, til að svara þessum (óskiljanlegu) ásökunum tveggja kvenna.

Hann bendir á að þetta sjónarspil sé í  raun runnið undan rifjum forsætisráðherra Svíþjóðar Fredrik Reinfeldt í samráði við vin sinn og starfsfélaga Karl Rove.  Sá síðarnefndi var háttsettur í starfsliði George Bush og er reglulegur yfirlýsingaglaður gestur í Fox News.  Hann hefur og áður verið sakaður um sviðsettar ákærur gagnvart óþægilegum fylkisstjóra, en Karl flýði land, til Svíþjóðar til að þurfa ekki að svara fyrir þær.

Bæði sá sænski og Karl Rove hafa fullgildar ástæður fyrir að vilja finna Assange í fjöru;   WikiLeaks gögn hafa gert lítið úr forsætisráðherra Svíþjóðar, og Rove berst fyrir orðspori sínu og gjörðum innan Bush stjórnarinnar, en leki WikiLeaks hefur einkum beinst að stjórnartíð hans.

Bandarísk stjórnvöld vinna að því öllum ráðum að finna lög sem hægt er að ákæra Assange fyrir.  Rætt hefur verið um "Espionage lögin"  um þjóðaröryggi, en vandinn er að þau lög eru ekki talin upp í framsalssamningi milli Svíþjóðar og US.

Samsæriskenning lögfræðingsins gengur út á að það sé verið að vinna tíma með því að negla Assange í réttarhöldum í Svíþjóð, þar til bandarískir lögfræðingar eru tilbúnir með skotheldar ákærur, sem framsalssamningur hleypir í gegn.

Þá er sænski saksóknarinn Marianne Ny álitin feminískur karlahatari af verstu sort!

Eftir að hafa lesið lýsingu  (sjá hlekk) á þeirri atburðarrás sem lögð er til grundvallar við þetta framsal, er varla annað hægt en að leiða hugann að samsæriskenningum.

Í raun, er lítill munur á framsalslögum frá Bretlandi  til US eða  Svíþjóð.  Þess vegna virkar sú vörn Assange lítt, að hann muni frekar verða framseldur frá Svíþjóð en Bretlandi.  Bandaríkin eru ekki tilbúin með ákæru, annars hefðu þeir löngu krafist framsals.

Fjölmiðlar heimsins munu varpa kösturum sínum á þetta mál alla leið.  Þess vegna væri best fyrir Assange að hefja vörn í meintu "nauðgunar" máli eða fá því vísað frá.

Leyfilegt að framselja Assange

Erum við Búddistar inn við beinið?

Neita því alls ekki að hafa stundum velt þvi fyrir mér, hvort ég aðhyllist sömu sýn á lífið og tilveruna og þeir sem kallast "Búddistar".

Innst inni viðurkenni ég að ég trúi á "karma"; illur fengur, illa forgengur og allt það,   með öðrum orðum ég trúi því að þeir sem eru góðir, sanngjarnir og heiðarlegir muni njóta þess síðar meir.  Á hinn bóginn erum við skilin að skiptum; ég og Búddistar þegar kemur að útskýringum á því að þeir "ríku" eigi það skilið, því þeir séu að njóta góðs af fyrri góðverkum.  Dæmi s.l. ára eru einfaldlega ekki nógu sannfærandi.

Reiði er heldur ekki Búddaleg, sem er líkleg skýring á því að blóðugar óeirðir eru ekki daglegt brauð í löndum eins og Thailandi, þar sem ég er stödd nú, þar sem misskipting og fátækt er uggvænleg.

Mér er sagt að lögreglan hér sé 100% spillt, hafir þú einhvern tíma þekkt "góða" löggu, þá er hún örugglega dáin.  Af sextiuogfjórum milljónum íbúa, greiða aðeins 2 milljónir skatta.  Spillingin nær uppúrogniðrúr, því fólkið trúir því að betra sé að skilja eftir pening hjá Búddalíkneski  heldur en að greiða skatta til samfélagsins. Ríkið leysir hins vegar úr lélegri skattheimtu, með því að reka lottó, þaðan koma helstu tekjurnar.

Sami aðili sagði mér líka að ef ekki væri fyrir Búddatrú, þá myndi ríkja borgarastyrjöld í landinu.

Þessi uppákoma um stjórnlagaþing, minnir óþyrmilega á "Florida-klúðrið" sem endaði fyrir hæstarétti Bandaríkjana með tilvísun í stjórnarskrá. Al Gore, steig á stokk og sýndi mikinn drengsskap, þegar hann bjargaði þjóðinni frá ævarandi niðurlægingu, játaði sig sigraðan og lofaði engin eftirmæli.     Nú snýst málið ekki um götunarspjöld og pappírsfliba, heldur pappaskilrúm!!!

Mætti ímynda sér að þeir sem dansa nú trylltan sigurdans, eins og eyrnastórir hobbitar,  vegna þess að þeim tókst að ógilda stjórnlagaþing á lagatæknilegum hlutum, héldu að Íslendingar væru Búddhistar inn við beinið og létu þetta yfir sig ganga með stóískri ró og hlýlegu brosi.

Það þarf engin lagatæknileg klókindi til að álykta að það er óðs manns æði að leika sér með eldspýtur í dínamítgeymslu.

Dagurinn í dag er svona dagur þegar mann langar til að segja sig úr stjórnmálasambandi við Ísland og kalla sendiherrann heim.

Svo les ég í fréttum að púðurtunnan í Bangkok er farin að hitna, gulu skyrturnar gegn hinum rauðu.

 

 

 

 

Niðurstaðan vel rökstudd

Hvítflibbar og Smákrimmar, harmleikur eða geðsýki.

Þegar upp kemst um starfsmann í fyrirtæki, sem hefur dregið til sín fé  um nokkra hríð, hafa þrír þættir í hinum svokallaða  svikaþríhyrning  (e; Fraud triangle) verið til staðar:

 

1.        Ástæða eða þvingun – þörfin fyrir að  fremja fjársvikin , algengasta ástæðan  er að afla peninga til að svala einhvers konar fíkn (spilafíkn, áfengis eða lyfjafíkn, kaupfíkn)

 

2.       Réttlæting – svikarinn réttlætir fjárdrátt -  ég á þetta skilið – þeir skulda mér þetta- mér var lofuð launahækkun – ég ætla bara að fá þetta lánað osv. fr

 

3.       Tækifæri – ástand sem skapast þegar eftirlit og eftirfylgni er ekki nægjanlegt og viðkomandi getur dregið til sín fé, án þess að upp komist jafnvel í langan tíma.

Oftast er það einskær tilviljun sem veldur því að viðkomandi fjárdráttur uppgötvast og sá seki er afhjúpaður.  Þessir aðilar hafa sérhæft sig í svikunum og passa sig á að fela alla slóð, fara  aldrei í löng frí og eru alltaf til staðar þegar áreitið er mest (um mánaðarmót).   Þegar fjárdráttur uppgötvast skapast oft undarlegt andrými með samblandi af vorkunn og skömm.   “Mannlegur harmleikur” hrópa sumir, og vorkenna gerandanum og fjölskyldu hans, en forsvarsmenn fórnarlambsins skammast sín oft niður í tær, því uppgötvun svika afhjúpar lélega stjórnun og innanhúsvanda. Það fer eiginlega eftir því hversu forhert svikin eru, hvort glæpurinn er kærður eða ekki.  Rannsóknir erlendis hafa sýnt að einungis 20% slíkra fjárdrátta eru kærð.

Flestir vilja trúa því að manneskjur séu í eðli sínu góðar og vænar.  Þess vegna geta margir samsamað sig við og afsakað nágrannan sem gerir sig sekan um dómgreindaskort og fremur fjárdrátt jafnvel til að fæða og klæða fjölskyldu sína.

Hvítflibbaglæpamenn

Allt öðru máli gegnir um “Hvítflibbana”, þá sem allir elska að hata.    Gagnvart þeim gildir bara ein hlið þríhyrningsins; tækifæri.  Það er ekki knýjandi þörf né ástæða  hvað þá réttlæting  sem þarf að vera til staðar svo að glæpur verði framinn, aðeins tækifæri.

U.þ.b. 1% mannkyns eru sýkópatar (e psychopaths).    Þó að  einkenni  sýkópata séu misalvarleg, frá því að vera laus við árásagirni til hættulegra glæpamanna, þá eiga þeir allir sameiginlegt að vera  félagslega vangefnir.  Eftirtalin persónuleikaeinkenni má undantekningalaust greina í dæmdum fjárglæpamönnum á pari við Madoff, Enron  og World Com stjórnendur:

·         Heillandi persónutöfrar

·         Óvenju tilkomumikið sjálfsálit

·         Þörf fyrir stöðugt áreiti / leiðindatilhneiging

·         Sjúklegur lygari

·         Stjórnsemi

·         Skortur á iðrun og skömm

·         Snertir ekki djúpt – grunnáhrif

·         Skortur á meðaumkun, samkennd  og samúð

·         Sníkjulífstíll

·         Stjórnlaus hegðun

·         Lauslát kynferðishegðun

·         Hegðunarvandamál birtast snemma  í æsku

·         Skortur á raunsæi og langtíma áætlunum

·         Hvatvísi

·         Ábyrgðarleysi

·         Viðurkennir ekki ábyrgð á eigin gjörðum

·         Mörg stutt hjónabönd eða sambönd

·         Unglingaafbrot

·         Afturköllun skilyrða

·         Fjölhæfir hugmyndaríkir glæpamenn

 

Það er algengur misskilningur að flestir “smákrimmar” séu  raunverulega ekki eins og aðrir glæpamenn.  Þeirra glæpir eru framdir án ofbeldis, ógnar eða brjálæðis, en vegna truflunar á dómgreind, fóru þeir aðeins út af beinu brautinni á erfiðum tíma.   Þessi misskilda skilgreining hjálpar sýkópatískum fjárglæframönnum að slá ryki í augu fólks.  Þeirra eina ástæða til að vakna á morgnana er að ljúga, svíkja, stela og stjórna þeim sem í kringum þá eru.     

Sýkópatar skortir  “ensím”   til að  finna tilfinningar eða samkennd  gagnvart samborgurum  ef frá er talinn allra þrengsti einhyrningur þeirra.  Þeir iðrast hvorki né skammast sín fyrir neitt.  Ef aðstæður eru þeim óvilhallar er það alltaf öllum öðrum að kenna.  Hvers vegna eigum við þá að sýna vott eða snefil af tilfinningasemi í þeirra garð, þegar þeir vita ekki um hvað hún snýst, þar sem þá skortir hana sjálfur.

Hagnýting svikaþrihyrnings

Fyrirtæki, stjórnvöld og skattayfirvöld geta hagnýtt sér svikaþríhyrningin gagnvart  smákrimmum, skattsvikurum og öðrum sem hafa tilhneigingu til að falla út af beinu brautinni (sic).  Með því að fækka og útrýma tækifærum, stuðla að því að flestir geti lifað með reisn og komi fram af  gagnkvæmri virðingu og kærleik.  80 prósent mannkyns er fólk sem vill lifa heiðarlegu lífi í sátt við sig og aðra.  Ef þeim býðst tækifæri til stundarauðgunar grípa þeir það gjarnan, eftir vandaða yfirlegu á áhættu og ávinningi. 9% munu alltaf svíkja og grípa tækifæri án þess endilega að hugsa um afleiðingar og 1% eru sýkópatar eins og áður er lýst.  Restin 10% eru "heilögu kýrnar" sem allir vilja að allir séu, en enginn vill bjóða í partý.

Ofangreindur pistill er unnin upp úr pælingum og fræðigreinum um svikara.

Hægvirkt skattaeftirlit og oggulítil fjársvikasaga

Það er alveg ár og öld, síðan sjálfur Jón Ásgeir lýsti því sjálfur að rekstrarkostnaður FL Group árið 2007 hefði verið glórulaus.  Tilefnið var að hann hafði eftir legu undir feldi tekið þá hraustlegu ákvörðun að bjarga FL Group, og leggja til mikla fjármuni (sic).

Ef grunur um alvarlegt skattalagabrot reynist á rökum reistur, getur skatturinn ekki vænst neinna endurheimta, jú sjáðu til FL varð gjaldþrota fyrir nokkrum árum.  Skattalagabrot varða einnig við fangelsi og einhvern veginn finnst mér að þetta mál sé nokkuð seint á ferðinni inn í efnahagsbrotadeildina.

Hér er oggulítil fjársvikasaga um WorldCom og Arthur Andersen endurskoðendafyrirtækið þeirra.

Það var innri endurskoðandi WorldCom Cynthia Cooper, sem uppgötvaði stærsta bókhaldssvindl í sögu Bandaríkjanna í upphafi aldar.  Uppgötvunin fólst í að $3.8 milljarða dollara (endanleg fjárhæð $11 milljarðar)línukostnaður hafði verið ranglega eignfærður í reikninga World Com til þess eins að fegra rekstrarniðurstöðu og viðhalda háu hlutabréfaverði.

Með því að eignfæra rekstrarkostnaðinn og afskrifa hann svo á nokkrum árum, er kostnaðinum líka haldið fyrir utan hina margumtöluðu EBITDA, sem íslenskir fjármálamenn bulluðu um í góðærinu.  (tvöföld snilld)

Fjörutiu manns að minnsta kosti vissu um svikin, en voru of skelfd til að segja frá.  Fjármálastjórinn (CFO) Scott Sullivan mútaði a.m.k. 7 manns með $10.000 tékkum.  

 

Starfsmenn breyttu lykilskjölum og neituðu Arthur Andersen endurskoðendafyrirtækinu aðgangi að gagnagrunni þar sem viðkvæmustu upplýsingarnar voru geymdar, og engin kvörtun barst frá Arthur Andersen, sem kaus að loka augum og sjá ekkert rangt.  (Don´t ask don´t tell syndrómið)

Yfirmaður bókhaldsins Buddy Gates var staðinn að því að snupra starfsmann sem kvartaði yfir stóru misræmi í bókhaldi; "Ef þú sýnir helv..... endurskoðendunum þessar tölur, hendi ég þér út um gluggann".

Cynthia Cooper var kjörinn ein af þremur mönnum ársins 2002 hjá Time Magazine.

 

 

Sagan er til að leggja áherslu á mikilvægi innri endurskoðenda, sem eru oftast í betri aðstöðu til að uppgötva fjársvik innan veggja fyrirtækja fremur en ytri endurskoðendur.  Þeir lúta beint undir stjórn fyrirtækja, og þurfa því ekki að  svara ábyrgð til fjármálastjóra eða framkvæmdastjóra.

Vandinn er bara sá, að í stærstu fjársvikamálunum er stjórnin gegnsýrð sjálf af spillingu, og þá þarf að reiða sig á skilvirkt skattaeftirlit og fjármálaeftirlit.

 

FL til efnahagsbrotadeildar

Markaðsmisnotkun og Innherjasvik / Biðin langa

Markaðsmisnotkun: Markaðsmisnotkun er óheimil. Með markaðsmisnotkun er átt við að:

 

1. eiga viðskipti eða gera tilboð sem:
   1. gefa eða eru líkleg til að gefa framboð, eftirspurn eða verð fjármálagerninga ranglega eða misvísandi til kynna, eða
   2. tryggja óeðlilegt verð eða búa til verð á einum eða fleirum fjármálagerningum, nema aðilinn sem átti viðskiptin eða gaf fyrirmæli um þau geti sýnt fram á að ástæður að baki þeim
2. eiga viðskipti eða gera tilboð sem byggð eru á tilbúningi eða þar sem notuð eru einhver form blekkingar eða sýndarmennsku,
3. dreifa upplýsingum, fréttum eða orðrómi sem gefa eða eru líkleg til að gefa rangar eða misvísandi upplýsingar eða vísbendingar um fjármálagerninga, enda hafi sá sem dreifði upplýsingunum vitað eða mátt vita að upplýsingarnar voru rangar eða misvísandi. Þegar fjölmiðlamenn miðla slíkum upplýsingum í krafti starfs síns ber að meta upplýsingamiðlunina með hliðsjón af reglum um starfsgrein þeirra, svo fremi þessir aðilar hljóti hvorki ávinning né hagnist af miðlun viðkomandi upplýsinga með beinum eða óbeinum hætti.

4. Innherjasvik: Innherja er óheimilt að:

5. afla eða ráðstafa fjármálagerningum með beinum eða óbeinum hætti, fyrir eigin reikning eða annarra, búi hann yfir innherjaupplýsingum,
6. láta þriðja aðila innherjaupplýsingar í té, nema það sé gert í eðlilegu sambandi við starf, stöðu eða skyldur þess sem upplýsingarnar veitir,
7. ráðleggja þriðja aðila á grundvelli innherjaupplýsinga að afla fjármálagerninga eða ráðstafa þeim eða hvetja að öðru leyti til viðskipta með fjármálagerningana.

Eftir hverju er verið að bíða?

450 milljarða lán á síðasta fundinum

Glæturnar Sjö frá WikiLeaks

 

 

WikiLeak sagan;  þrýstir á „nýsköpun“ í viðskiptum.

Umræðan um WikiLeaks hefur að mestu snúist um á hvaða lagalega og siðferðislega planka þeir standa.

Ef aðeins væri hægt að stíga nokkur skref afturábak, íhuga og án þess að dæma fyrirfram, má sjá mörg hrífandi dæmi um hvernig  „nýi fjölmiðillinn“ virkar fram og aftur, auk nokkurra frábærra kennslustunda í viðskiptum.  Það er jafnvel hægt að líta á þetta sem sögustund í varfærni.

Eftirfarandi eru sjö atriði sem WikiLeaks hefur kennt okkur;

1.       1.  Gegnsæi fyrst og fremst.

Ef lykilstaða þín er; að fela upplýsingar og byggja leyndarhjúp, mun þessi nýji tími orsaka margar svefnlausar nætur.  WikiLeaks sýnir fram á að stjórnun fyrirtækja mun farnast betur með gegnsæi. Leynd  sé aðeins hjúpuð í  ítrustu stjórnunarneyð og þar sem aðeins á við ( „Coca cola uppskriftina“ sem dæmi.)

Stjórnun undir leyndarhjúpi á enga lífsvon í nýum gegnsæjum heimi.  Net og sítenging fólks við upplýsingar hvaðænava að,  er orðið nýtt menningarlegt norm, svo að hvers konar aðgerðir af hálfu ríkisstjórna eða fyrirtækja, sem skortir gegnsæi munu vera hjúpaðar eyðileggjandi neikvæðni. 

 

2.       2.  Þú ert fjölmiðill.

Hver einast einstaklingur getur „út“varpað hugsunum sínum í formi texta, mynda, hljóð eða myndflutnings, ókeypis um alla heimsbyggðina.  Þetta þýðir ekki endilega að allir eru „út“vörp, það þýðir einfaldlega að allir eru eða geta orðið fjölmiðill.  WikiLeaks er fjölmiðill eins og Mathew Ingram benti á í Gigaom Blog.    Ef við sannmælumst um þessa skilgreiningu, að einhverju leiti,  þá er frelsi fjölmiðla (einstaklinga)  varin í fyrsta kafla stjórnarskráa flestra vestrænna ríkja.

 

3.       3.  Útgáfa hefur breyst.

Þessi liður tengist öðrum lið.  Hvort sem okkur líkar betur eða verr, er WikiLeaks bæði útgefandi innihalds og  einnig  fjölmiðill.  Þetta þýðir að samfélagið þarf að endurmeta skilgreiningu á útgáfu.   

 

4.       4.  Upplýsingar á hraðbyri   löglegar eður ei.  Við höfum hliðrað  til rauntíma upplýsinga.  Við lesum ekki um flugslys á CNN, við fréttum af því af á Facebook og Tvitter því að við lesum, sjáum myndir og myndbönd og upplýsingar frá þeim sem komust af í flugslysinu og  eru með rauntíma útsendingar af eigin björgun.  Upplýsingarnar koma ekki hraðar, þær koma um leið og þær gerast.

 

5.       5.  Afnám miðstýringar er raunveruleg   WikiLeaks hefur dreift miklu magni af upplýsingum til stórra fjölmiðla, sem hafa „matreitt“ upplýsingarnar á skiljanlegan og skýran hátt til fólksins.  Þessi aðferð og stjórnun WikiLeaks bendir til nýrra tíma.  „Nýju“ fyrirtækin geta verið (og eru) án allrar miðstýringar, rekin á nokkrum fartölvum og hátæknisímum.  Þau eru raunverulegur keppinautur. Höfuðstöðvar þessara fyrirtækja gætu verið „uppáhaldskaffihúsið“ þess vegna.

 

6.       6.  Trúverðugleiki að baki „nikksins“     verður líklega „nýjasta trendið“ sem við munum sjá.    Hvort mun vekja meiri trúverðugleika, bókmenntafræðingar undir fullu nafni  eða „nafnlaus“ sem bókmenntagagnrýnir að leggja mat á  bókaútgáfuna fyrir þessi jól.  Hvað vitum við raunverulega um Julian Assange?  Munu þessar ásakanir um kynferðisbrot skerða trúverðugleika gagnanna sem WikiLeaks er að gefa út?  Á meðan almennir fjölmiðlar opna sig og leyfa einstaklingum að tjá sig frjálslega  um hvaðeina, mun útgáfa undir nafnleysi lifa áfram og trúverðugleikinn mun verða jafnvel meiri en þeirra sem koma undir „fullu nafni“ .

7.-- 7.  Við erum ekki tilbúin.

Sjokkið við WikiLeaks er hvernig allir þeir (sem skilja ekki hvernig Internetið virkar) bregðast við.  Þeir eru ekki vanir svona skipulagningu, framsetningu né viðbrögðum við hvorutveggja.  Þetta virkar fáránlega og þess vegna er þetta bæði ógnandi og einkennilegt.  Þessi viðbrögð endurspegla  í raun   að við séum „ekki tilbúin“ þeim miklu breytingum sem eru að gerast.

 

Að öllu framansögðu, verðum við ekki  að líta á WikiLeak söguna sem gríðarlegt tækifæri  fyrir fyrirtæki til að hlusta, skilja,vaxa og meðtaka?  Þetta eru allt sterk skilaboð um framtíðarleitni sem við munum sjá í viðskiptum og stjórnsýslu.

 

Höfundur:  Mitch Joel  President of Twist Image  og höfundur bókarinnar Six Pixel of Separation.

Grein birtist í Vancouver Sun  24.desember 2010.

Þýtt og frjálslega staðfært.